tg-me.com/alshaherh/1745
Last Update:
يجي العيد ونعايد بس صوركم
يعطر ثيابكم يا ضيم اهلكم
يغالين ،، حچي العين
نحبكم والنجف يشهد نحبكم
***
يجي العيد ،، نغبش للمگابر من يجي العيد
شنو يريد ،، الروحه بنص گبر لتگله شيريد
صباح الخير تحلى بوجه الاحباب
وصلنه وي الفجر وصوركم الباب
نمد چفوفنه وما يرضى التراب
ها يهل المگابر صرنه شياب
انحنينه من البعد بالاسم عدلين
چنهه ايام تتلگونه ميتين
علگبور ،، هلندور
ولا صوت اليرحب بالمجبلين
چنهه ايام تتلگونه ميتين
**
بعد وين ،، ما نسمع هلا ماتو بعد وين
دواوين ،، ظلت محد أيمر بالدواوين
تلگو احبابكم حسبونه خطار
ونشدونه اعله وحشة طبت الدار
بعدنه اعله الصور كلساعه نندار
بلكت چلمه وحده اتبرد النار
تسمعونه يهلنه ما تسمعون
گضتنه المگبره ودرب اليشيعون
ولا صوت ،، صدگ موت
ياخذ كل عزيز تريده العيون
گضتنه المگبره ودرب اليشيعون
**
شنو يصير ،، اذا نتلاگه بس مره شنو يصير
جنح طير ،، عليكم هيچ فرفحنه جنح طير
نطب وادي السلام ونحسب گبور
وينه أوينه نايم عطر البخور
علي يابو الحسن يا سيد النور
يمك كل اهلنه وانته ناطور
اليندب يا علي تحضر مماته
تأمن وحشته وشدة وفاته
أله تكون ،، ضوه عيون
واحن من ولده واقرب من بناته
تأمن وحشته وشدة وفاته
***
نفس حار ،، يچوي تراب النحبهم نفس حار
گلب نار ،، يطفى بشبگة الراحو گلب نار
الشالونه بزغرنه التعبو اسنين
التغطينه بحظنهم وين ماشين
البارونه وكبرنه هناك ميتين
بعد منشوفهم صارو بعيدين
نريد نوافي تونه وراحو بساع
المحنه الاوليه بذمة الگاع
الدفو مات ،، حرامات
مشو والبقن موتت عين وذراع
المحنه الاوليه بذمة الگاع
*****
يلحنان ،، نعيش بواهس الذكرى يلحنان
يبيبان ،، تردن چم عزيز النه يبيبان
نتاني اعله الدرب ما يرحم الشوگ
يريد (انفاس)( نظره ) الصدره مخنوگ
يعيش شلون بله الحيله مبيوگ ؟
المحد رد اله بس عينه ليفوگ
يلاهي افراگهم چمره بگلبنه
نشوف عيونهم هذا طلبنه
صعب لا ،، واويلاه
تعبنه وداعت العشره تعبنه
نشوف عيونهم هذا طلبنه
كلمات الخادم / رعد الفريجي
BY خادم الحسين رعد الفريجي
Warning: Undefined variable $i in /var/www/tg-me/post.php on line 280
Share with your friend now:
tg-me.com/alshaherh/1745